Samarqand viloyatida 2026-yilda o‘tkaziladigan aholi va qishloq xo‘jaligini ro‘yxatga olish tadbirlariga tayyorgarlik jarayonlarini jadallashtirish maqsadida navbatdagi muhim yig‘ilish “ZOOM” platformasi orqali o‘tkazildi.
Ushbu yig‘ilishga viloyat hokimining birinchi o‘rinbosari Sh. Buranov, O‘zbekiston Respublikasi Milliy statistika qo‘mitasi raisi B. Hamrayev, tuman hokimi D. Shakarboyev, shuningdek, viloyat va tumanlardagi tegishli tashkilotlar, sektor rahbarlari hamda “mahalla yettiligi” tarkibi vakillari qatnashdi.
Onlayn formatda o‘tkazilgan majlis davomida viloyatning barcha mahallalarida ro‘yxatga olish jarayonlarini izchil tashkil etish, tayyorgarlik darajasini oshirish hamda har bir mas’ulning aniq vazifalarini belgilash masalalari atroflicha muhokama qilindi.
Majlisda quyidagi masalalarga alohida e’tibor qaratildi:
- Mahalla yettiligi tarkibining vazifalari – ro‘yxatga olish jarayonida har bir a’zoning mas’uliyat doirasi, fuqarolar bilan ishlash tartibi, xonadonlarga kirish madaniyati va ma’lumotlarni to‘g‘ri qayd etish talablari tushuntirildi.
- Aholi bilan ishlashning yangi mexanizmlari – aholiga ro‘yxatga olishning mazmun-mohiyati haqida yetarli ma’lumot yetkazish, uyma-uy yurish bo‘yicha aniq ko‘rsatmalar, onlayn ro‘yxatdan o‘tish jarayonini tushuntirish bo‘yicha chora-tadbirlar belgilandi.
- Statistik ma’lumotlarning to‘g‘riligi – ro‘yxatga olishda kiritiladigan har bir ma’lumotning ishonchliligi, elektron tizimlarda qayd etish tartibi, xatoliklarni oldindan aniqlash bo‘yicha metodik tavsiyalar berildi.
- Raqamli tizimlardan foydalanish – census.stat.uz platformasida ishlash, ro‘yxatga olish mobil ilovasidan foydalanish, texnik qo‘llab-quvvatlash tizimlari haqida batafsil ma’lumot berildi.
- Hududlarda holatni tahlil qilish – mahallalardagi tayyorgarlik darajasi, xodimlarning savodxonligi va ko‘nikmalari, mavjud muammolar va ularni tezkor bartaraf etish mexanizmlari muhokama qilindi.
Yig‘ilish yakunida viloyat hokimining birinchi o‘rinbosari va Milliy statistika qo‘mitasi raisi tomonidan barcha mahalla yettiligi a’zolari hamda tuman mas’ullariga:
— aholining xabardorligini oshirish;
— targ‘ibot-tushuntirish tadbirlarini kuchaytirish;
— ro‘yxatga olish jarayonlarini belgilangan talablarga muvofiq olib borish;
— muammolarni joyida hal qilish;
— javobgarlik va intizomni kuchaytirish
bo‘yicha aniq topshiriqlar berildi.